ⵉⴳⴰ ⵓⵣⵔⴼ ⴳ ⵜⵡⵏⵏⴰⴹⵜ ⵜⴰⵎⵉⵣⴷⴰⴳⵜ ⴷ ⵜⵙⵓⵍⴰⵏⵜ ⵙⴳ ⵉⵣⵔⴼⴰⵏ ⵉⵜⵜⵢⴰⵔⴰⵏ ⴳ ⵜⵓⴳⵜ ⵏ ⵡⴰⵔⵔⴰⵜⵏ ⴷ ⵜⵏⵜⵜⴰⵎⵉⵏ ⵜⵉⴳⵔⴰⵖⵍⴰⵏⵉⵏ, ⵙⴳⵉⵙⵏ ⴰⵍⵖⵓ ⵏ ⵙⵜⵓⴽⵀⵓⵍⵎ ⵉⵥⵍⵉⵏ ⵙ ⵜⵡⵏⵏⴰⴹⵜ ⵜⴰⵏⴼⴳⴰⵏⵜ, ⴷ ⵜⵎⵢⴰⵇⵇⴰⵏⵜ ⵏ ⵔⵢⵓ ⵉⵥⵍⵉⵏ ⵙ ⵓⵎⵢⴰⵏⴰⵡ ⴰⴱⵢⵓⵍⵓⵊⵉ, ⴷ ⵜⵎⵢⴰⵇⵇⴰⵏⵜ ⵜⴰⵙⴰⵜⵉⵜ ⵏ ⵜⵎⵜⵜⴰ ⵉⵎⵓⵏⵏ ⵉⵥⵍⵉⵏ ⵙ ⵉⵙⵏⴼⵍⵏ ⵏ ⵓⵏⴳⵉⴳⵜ ⴷ ⵓⵎⵙⴰⵙⴰ ⵏ ⴱⴰⵔⵉⵣ ⵉⵥⵍⵉⵏ ⵙ ⵉⵙⵏⴼⵍⵏ ⵏ ⵓⵏⴳⵉⴳⵜ.
ⴳ ⵓⵙⵡⵉⵔ ⴰⵏⴰⵎⵓⵔ, ⵉⵙⵡⵓⵔⵉ ⵍⵎⵖⵔⵉⴱ ⵙ ⵜⴳⵔⵓⵎⵎⴰ ⵏ ⵉⵙⵍⴳⵏⵏ, ⴰⵎⴰⵏⴰⵔ ⵏⵏⵙⵏ ⴰⵙⵍⴳⵏ ⵓⵟⵟⵓⵏ 49.17 ⵉⵜⵜⵓⵙⵖⵣⵏⵏ ⴳ ⵢⵓⵍⵢⵓⵣ 2020 ⵉⵣⴷⵉⵏ ⵙ ⵓⵙⵓⵜⴳ ⴰⵡⵏⴹⴰⵏ ⴷ ⵓⵙⵍⴳⵏ ⵓⵟⵟⵓⵏ 36-15 ⵉⵣⴷⵉⵏ ⵙ ⵡⴰⵎⴰⵏ ⵉⵜⵜⵓⴼⵙⴰⵔⵏ ⴰⵙⴳⴳⵯⴰⵙ ⵏ 2016, ⴷ ⵓⵙⵍⴳⵏ ⵓⵟⵟⵓⵏ 12-81 ⵏ ⵓⵙⴳⴳⵯⴰⵙ ⵏ 2015 ⵉⵣⴷⵉⵏ ⵙ ⵓⴼⵜⴰⵙ, ⴷ ⵓⵙⵍⴳⵏ ⴰⴷⵙⵍⴰⵏ ⵓⵟⵟⵓⵏ 11-03 ⵏ ⵓⵙⴳⴳⵯⴰⵙ 2003 ⵉⵣⴷⵉⵏ ⵙ ⵓⴼⵔⴰⴳ ⵏ ⵜⵡⵏⵏⴰⴹⵜ ⴷ ⵓⵙⴷⵓⵙ ⵏⵏⵙ, ⴷ ⵓⵍⴰ ⴰⵙⵍⴳⵏ ⵓⵟⵟⵓⵏ 99-12 ⵉⵣⴷⵉⵏ ⴷ ⵜⵏⵜⵜⴰⵎⵜ ⵜⴰⵏⴰⵎⵓⵔⵜ ⵏ ⵜⵡⵏⵏⴰⴹⵜ ⴷ ⵜⴳⵎⵉ ⵜⴰⵙⵓⵍⴰⵏⵜ ⵏ ⵓⵙⴳⴳⵯⴰⵙ 2014.
ⵙ ⵓⵜⴰⵎ ⵙ ⵢⵉⴹⵉⵚ ⵏ ⵉⵙⵏⴼⵍⵏ ⵏ ⵓⵏⴳⵉⴳⵜ ⵅⴼ ⵉⵣⵔⴼⴰⵏ ⵉⴷⵙⵍⴰⵏⵏ ⵏ ⵓⴼⴳⴰⵏ ⵣⵓⵏ ⴷ ⴰⵣⵔⴼ ⴳ ⵜⵓⴷⵔⵜ ⴷ ⵜⴳⵎⵉ ⴷ ⵡⵓⵜⵛⵉ ⴷ ⵡⴰⵎⴰⵏ ⴷ ⵜⵣⴷⵓⵖⵜ ⴷ ⵓⵙⴳⵎⵉ, ⵉⵙⴽⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙⴳ ⵓⵣⵔⴼ ⴳ ⵜⵡⵏⵏⴰⴹⵜ ⴷ ⴳ ⵜⴳⵎⵉ ⵜⴰⵙⵓⵍⴰⵏⵜ ⵢⴰⵏ ⵙⴳ ⵉⵙⴳⵓⵎⵏ ⵉⴷⵙⵍⴰⵏⵏ ⵏ ⵜⵡⵓⵔⵉ ⵏⵏⵙ, ⵜⴰⵎⵓ ⴳ ⵜⵎⵍⴰⵍⵜ ⵏ ⵓⵙⵇⵇⵉⵎ ⵜⵉⴹⴰⴼ ⴷ ⵢⵉⵎⵉⵥ ⵏ ⵜⵏⵓⵔⵣⵉⵏ ⴳ ⵓⵙⵡⵉⵔ ⴰⵏⴰⵎⵎⴰⵙ ⴷ ⴳ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⴷ ⵓⵎⵢⴰⵖ ⴷⵉⴷⵙⵏⵜ ⴷ ⵓⵙⴷⵓⵙ ⵏ ⵜⵣⵎⵎⴰⵔ ⴷ ⵓⵙⵡⴰⵍⴰ ⵏ ⵉⵙⵖⵍⴰⴼ ⵉ ⵜⵓⴳⵜ ⵏ ⵜⵙⴳⴳⵯⵉⵏ ⵜⵉⵎⴰⴷⴷⵓⴷⵉⵏ ⵜⵉⵎⵏⵜⴰⵢⵉⵏ.
ⴳ ⵓⵎⵏⵉⴷ ⴰⴷ, ⵉⵙⵙⴰⴼⵖ ⴷ ⵓⵙⵇⵇⵉⵎ ⴰⵙⴳⴳⵯⴰⵙ ⵏ 2022 ⵢⴰⵜ ⵜⵎⵙⵙⴽⵜⵉⵜ ⵅⴼ ⵓⵣⵔⴼ ⴳ ⵡⴰⵎⴰⵏ ⴷⴷⵓ ⵓⵣⵡⵍ “ⴰⵣⵔⴼ ⴳ ⵡⴰⵎⴰⵏ : ⵉⵙⴰⴷⴰⴼⵏ ⵉ ⵓⵎⵏⴰⵍⴰ ⵏ ⵓⵔⴼⵓⴼⵏ ⵏ ⵡⴰⵎⴰⵏ ⴳ ⵍⵎⵖⵔⵉⴱ”, ⵙ ⵓⵡⵜⵜⴰⵙ ⵏ ⵜⴷⵔⴰⵡⵜ ⴳ ⵓⵎⵔⴰⵔⴰ ⴰⴳⴷⵓⴷⴰⵏ ⵅⴼ ⵉⵎⵙⴰⵔⴰⵙⵏ ⵏ ⵓⵔⴼⵓⴼⵏ ⵏ ⵡⴰⵎⴰⵏ ⴷ ⵜⴱⵔⵉⴷⵉⵏ ⵏ ⵓⵙⴱⴷⴷⵉ ⵏⵏⵙ.
ⴰⵔ ⵜⵙⵎⵏⵉⴷ ⵜⵎⵙⵙⴽⵜⵉⵜ ⴰⴷ ⵉⵜⵜⵓⵙⵡⴰⵍⴰⵏ ⵉ ⵜⵎⵔⵙⴰⵍ ⴷ ⵜⵙⴳⴳⵯⵉⵏ ⵏⵜⴰⵢⵏⵉⵏ ⵙ ⵜⵏⴼⵔⵓⵜ ⵏ ⵡⴰⵎⴰⵏ ⴷ ⵓⴹⴰⴽⴰⵍ ⵏ ⵓⵣⵔⴼ ⴳ ⵡⴰⵎⴰⵏ ⴷ ⵉ ⵓⵎⵏⴰⴷ ⴰⵎⴰⵜⴰⵢ ⴰⵏⴰⵎⵓⵔ, ⵜⴰⴳⵔⵓⵎⵎⴰ ⵏ ⵉⵙⵖⵍⴰⴼ ⴷ ⵜⵙⵓⵎⴰⵔ ⵉⵙⵡⵓⵜⵜⵙⵏ ⴰⵎⵏⴰⵍⴰ ⵏ ⵓⵔⴼⵓⴼⵏ ⵏ ⵡⴰⵎⴰⵏ ⴷ ⵓⵙⴷⵓⵙ ⵏ ⵓⵣⵔⴼ ⴳ ⵡⴰⵎⴰⵏ, ⴷ ⵓⴹⴰⴽⴰⵍ ⵏ ⵓⵙⵖⵓⴷⵓ ⵏ ⵓⵙⵡⵓⴷⴷⵓ ⵏⵏⵙ, ⴷ ⵓⴼⵔⴰⴳ ⵏ ⵓⵣⵔⴼ ⵏ ⵜⵙⵓⵜⵉⵏ ⴷ ⵉⴷⴷⴰⵏ ⴷ ⵓⵙⵙⴰⵔⵓ ⴳ ⵢⵉⴳⵔ ⵏ ⵓⵔⵣⵣⵓ ⴰⵎⴰⵙⵙⴰⵏ ⵏⵏⵉ ⵉⴳⴰⵏ ⴰⵙⵜⴰⵢ ⴰⵙⵜⵕⴰⵜⵉⵊⵉ ⵉⵣⵎⵔⵏ ⴰⴷ ⵉⵙⴱⵓⵖⵍⵓ ⵜⵉⵣⵎⵎⴰⵔ ⵏ ⵍⵎⵖⵔⵉⴱ ⴳ ⵢⵉⴳⵔⴰⵏ ⵉⵎⴰⴷⴷⴰⵔⵏ ⴷ ⵢⵉⴳⵔ ⵏ ⵜⵎⵙⵙⵓⴳⵓⵔⵜ ⴷ ⵓⵙⵡⵓⴷⴷⵓ ⵏ ⵉⵙⵓⴳⴰⵎ ⵏ ⵡⴰⵎⴰⵏ.
ⵉⴷⵔⵓ ⵓⵙⵇⵇⵉⵎ ⴳ ⵓⴳⵔⴰⵡ ⵏ ⵜⴼⵓⵍⵉⵏ ⵡⵉⵙ 27 ⴳ ⵛⴰⵕⴰⵎ ⵛⴰⵢⵅ ⴳ ⵎⵉⵚⵕ, ⵉⴷⵔⵓ ⴳ ⵓⵣⵎⵎⴻⵎ ⵏ ⵜⴱⵔⴰⵜ ⵉⵏⵏⵓⵕⵥⵎⵏ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵜⵜⵓⵙⵡⴰⵍⴰⵏ ⵉ ⵉⵡⴰⵏⴽⵏ ⴳⴰⵏⵉⵏ ⵜⵉⴼⵓⵍⵉⵏ ⴳ ⵜⵎⵢⴰⵇⵇⴰⵏⵜ ⵜⴰⵙⴰⵜⵉⵜ ⵏ ⵜⵎⵜⵜⴰ ⵉⵎⵓⵏⵏ ⵉⵥⵍⵉⵏ ⵙ ⵓⵙⵏⴼⵍ ⴰⵏⴳⵉⴳⵜ ⴷ ⵓⵎⵙⴰⵙⴰ ⵏ ⴱⴰⵔⵉⵣ ⵅⴼ ⵓⵙⴷⵓⵙ ⵏ ⵜⵡⵓⵔⵉ ⵏ ⵓⵏⵣⵡⵉ ⵙ ⵎⴰⴷ ⵉⵎⵙⴰⵙⴰⵏ ⴷ ⵜⵎⵔⵉⵙⵉⵏ ⵏⵏⵙ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⴳ ⵓⵙⴰⵜⵉ ⵏ ⵓⵏⵄⴰⵕ ⵏⵏⵙ ⵅⴼ ⵓⵍⴽⴰⵎ ⵙ ⵜⵎⵢⴰⴳⴰⵏⵜ ⵏ ⵓⵣⵔⴼ ⴳ ⵜⵡⵏⵏⴰⴹⵜ ⵜⴰⵎⵣⴷⴰⴳⵜ, ⵉⵙⴷⴷⵉⴷ ⵓⵙⵇⵇⵉⵎⴳ ⵜⴰⵏⴰⴹⵉⵏ ⵏⵏⵙ ⵜⵉⵙⴳⵯⵙⴰⵏⵉⵏ ⵅⴼ ⵓⵙⵓⵖⵏ ⵏ ⵓⵙⵔⵓⵙ ⵏ ⵓⵙⴰⵜⵉ ⵓⵍⴳⵉⵏ ⴰⵖⵣⵓⵔⴰⵏ ⵉ ⵉⵙⵍⴳⵏⵏ ⴰⴽⴽⵯ ⵉⵣⴷⵉⵏ ⵙ ⵓⴼⵔⴰⴳ ⵏ ⵜⵡⵏⵏⴰⴹⵜ, ⵙ ⵓⵎⵙⴰⵙⴰ ⴷ ⵜⵎⵢⴰⴷⴰⵙⵜ ⵜⴰⵎⵛⴰⵡⴰⵕⵜ ⴷ ⵜⵏⵊⵎⵓⵜ ⵢⵓⵎⴰⵏ ⵜⵓⴳⵜ ⵏ ⵉⵎⴳⴳⴰⵢⵏ, ⴳ ⵏⵉⵜ ⵍⵍⴰⵏⵜ ⵜⵎⵔⵙⴰⵍ ⴷ ⵉⴳⵎⴰⵎⵏ ⵏ ⵡⴰⵎⵓⵏ ⵓⵖⵔⵉⵎ ⵉⵙⵎⴰⴳⴳⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵎⴽⵍⵍⵉ ⵢⴰⵇⵇⵔⴰ ⵉ ⵜⵓⴳⵜ ⵏ ⵜⵎⵏⴰⴹⵉⵏ ⵜⵉⵎⴳⴳⴰⵢⵉⵏ ⴰⴷ ⵙⵎⵣⴷⵉⵏⵜ ⵜⵓⴳⴳⴰⵣ ⵏⵏⵙⵏⵜ ⴰⴼⴰⴷ ⴰⴷ ⵙⵖⵉⵡⵙⵏ ⵜⵉⵙⵔⵜⴰⵢ ⴷ ⵉⵖⴰⵡⴰⵙⵏ ⵉⵡⵏⴹⴰⵏⵏ ⵉⵕⵡⴰⵏ, ⴰⵡⵜⵜⴰⵙ ⵏⵏⵙⵏⵜ ⴰⴼⵔⴰⴳ ⵏ ⵉⵙⵓⴳⴰⵎ ⵉⴳⴰⵎⴰⵏⵏ ⵉⵏⴰⵎⵓⵔⵏ, ⵙⵍⴰⵡⴰⵏ ⴰⴽⴽⵯ ⵉⵙⵓⴳⴰⵎ ⵉⵙⴷⵉⴷⴷⵉⵢⵏ ⵙ ⵜⴰⵖⴰⵔⵜ ⴷ ⵓⵙⵏⴼⵍ ⵏ ⵓⵏⴳⵉⴳⵜ ⴷ ⵓⵙⵙⵎⵓⵔ. ⵅⴼ ⵉⴳⴳⵉ ⵏ ⵎⴰⵢⴰ ⵏⵏ, ⴷⴰ ⵢⴰⵇⵇⵔⴰ ⵓⵙⵇⵇⵉⵎ ⵙ ⵓⵙⵎⵀⵍ ⵏ ⵜⵎⵍⴰⵍⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⵎⵛⵛⵉⵡⴰⵕ : ⴰⵙⵇⵇⵉⵎ ⴰⵏⴰⴼⵍⵍⴰ ⵏ ⵡⴰⵎⴰⵏ ⴷ ⵓⵏⴳⵉⴳⵜ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵡⵏⵏⴰⴹⵜ, ⵙ ⵓⵣⵣⵔⴰⵢ ⵉ ⵉⵙⴱⴷⴰⴷⵏ ⵓⵍⴳⵉⵏⵏ ⴷⴰ ⵜⵏⵜ ⵉⵙⵏⵎⴰⵍⴰⵏ, ⵙ ⵜⵡⵉⵍⴰ ⵉⵙⵅⴰⵜⴰⵔⵏ ⵙ ⵜⵡⵓⵔⵉⵡⵉⵏ ⵏⵏⵙⵏⵜ, ⵜⵙⴷⵓⵙ ⴰⵏⵙⴰ ⵏⵏⵙⵏⵜ ⴳ ⵓⵥⵟⵟⴰ ⴰⵎⵔⵙⴰⵍ, ⵉⵙⵙⵉⵔⵉⵡ ⴰⵙⵏⴰⵢ ⵏⵏⵙⵏⵜ ⵙ ⵡⴰⴷⴰⴼ ⵏ ⵜⵙⵎⴷⵢⴰⵜ ⵏ ⵜⵎⵔⵙⴰⵍ ⵏ ⵓⵏⴱⴰⴹ ⴰⴷⵙⵜⴰⵔ ⴷ ⵉⵏⴳⵎⴰⵎⵏ ⵏ ⵡⴰⵎⵓⵏ ⵓⵖⵔⵉⵎ.
ⵜⵉⵎⵉⵔⵉⵏ
